CAMPAGNA DE LA BÀSA

Campagna dè la Bàsa,
‘nduè sa va ‘ntra i sternìde del fè
e ‘l vers di anidre che sguàsa,
antàt che tramunta ‘l dè;

e ‘l cör par che ‘l sa sfràsa
e ‘l öcc al sa pèrt an di fiàme
del ciel che ‘l sumea facc de brasa!
Cantà de don,luntane…

Campagna dè la Bàsa,
‘nduè sa va ‘ntra i rüide e i rübì,
‘ntra l ‘üdur di rûse,chi pàsa
scundìde ‘n tra i erbe e i spì

Pracc de trifòi e menta,
brüghèra sperdìda ‘n banda al fiüm,
che la spécia ‘n de l’ aqua lènta.
Tèra de mëla prüfüm !

Campagna dè la Bàsa,
‘nduè sa va ‘ntra i marside e l’aràt,
mide de rüt e téra gràsa,
rusadèi e salcc del gat.

Sufegàda al sul d’agost,
svapora la cùdiga del prat;
i üséi i è ‘ngrupàcc dèt an del bosc;
grèf l’è ‘l respìr de l’estat!…

Campagna dè la Bàsa,
quanda i ?ltime ?giàde de sul
i ‘ndora l’aut?n che pàsa,
partès i rundine ‘n vul.

Ma ‘ndel ciel che ‘l sa ‘ngrìsa
‘l ciòca’l merlo l’eterna cansù;
sa lèa ‘na fasàna,’mpruisa:
ga va drè an sguisetù.

Campagna dè la Bàsa,
‘nduè sa va ‘ntra ‘l umbàs di nèbie,
che,’mè ‘na nìgula,i sa sbàsa
sura i stungiù di stübie.

Aria de tramontana,
lanche želàde d’aqua morta…
L’è ‘n sogn ‘l prüfüm d’ erba lürana,
chèl de la rüga forta !…

Campagna dè la Bàsa,
tèra de la mè set antiga
richèsa e forsa d’una ràsa
üsàda a la fadìga,

che la sìra ‘n funt al cör
-brasca che sbròia suta sènder-
al sentimènt istès d’un tesor,
apasiunàt e tènder !

Che nustalgìa di storie
De set e löc,che ‘l tep che pàsa
l’à cunfinàt ‘ndì mé memorie,
campagna dè la Bàsa!

traduzione