Concorso "TREVILLE" 1° classif. Poesia dialettale a. 2004

ÒTER TÈMP
Nàem en pentèra sota 'l sùl de löi,
curìem per le caedàgne e i sentér.
El cör l'era cuntènt, perchè sìem fiöi,
e furìa tante speranse en dei pensér.

Mangiàem sèmper pulènta. tanta pulènta,
perchè de taöl ga n'era póch o mìa.
Zà a la matìna, 'ndèl lat, fresca freschènta
o brustulìda, a secónd de come la piazìa.

A scöla en Castèl i na mandàa coi truculì,
argü finamai con sóta en tòch de cuertù.
L'astucio de lègn, la pèna coi pinì
i stàa déter en de 'na bursa de cartù.

Purtàem braghe cürte, camìza a pindulù,
roba mìa pròpe fada sö müsüra,
che pasàa da 'n fradèl a l'óter, en sucesiù,
che sa sfursàa de fa la sò fügüra.

Góm emparàt prèst, pörtròp a nòste spese,
che la vita ai puarècc la ga regala gnènt;
anche se ta sét bù, magare sensa pretese,
ta garé sèmper de trabülà: tègnel a mènt.

Sìem come i uzilì che sa cuntènta
de chèl che 'l Cel el manda dé per dé.
L'era asé l'amùr, che i cröse el ta 'ndurmènta
e ta dà la forsa per tignìt en pé.

Quand sbucùne stè mumèncc coi mé sculér,
i ma arda con dù üciù de stralünacc.
E alura ma vé en döbe: "Ma él stat iér,
o de pö de sinquant'àgn éi zà pasàcc?!".

Pierino Pini